ملحمة قبائل سبيع الغلباء

[خيال الغلباء]

بسم الله الرحمن الرحيم

ملحمة الشاعر/ مسند بن سعود المجمعي السبيعي في ملوك وأمراء وقبائل جزيرة العرب

بديت بإسم الله على أول ما أبداء
الواحد اللي سامك الأركان

الواحد المعبود علاّم ماخفى
علاّم مايخفى على الأنسان

من بعدها هاضت هجوسي بقافها
أبيات شعرٍ قالها فهمان

أنظم معانيها واعدّل بيوتها
وأختار مايصفي من القيفان

أقولها يوم ان قلبي يهوجس
وهيّض عليّ ماضي الزمان

ذكرت وقت ٍ بالزمان الماضي
يوم الحروب وزوغة الأذهان

يوم المسافر مايسافر وحده
والأرض مايوجد عليها أمان

واليوم فضل الله علينا ضافي
في ظل أبوفيصل بلا جحدان

فهد ملكنا قايد الشعب رايده
حر ٍنهض وإنهد بالجنحان

أنشاء المدارس لأجل تعليم البشر
وأنشاء المحاكم تعطي الحقّان

وأنشأ لنا طرق ٍ تقرّب بعيدها
ومستشفيات تعالج المرضان

وعبدالله اللي حل كل صعيبه
سياسته ذاعت بها البلدان

النائب الأول وهو ريّس الحرس
ريّس حرسنا وافي الذرعان

والنائب الثاني عضيده مساعده
أبوفهد درع ٍ على الأمتان

هوقايد ٍ للجيش وحنا جنوده
والعز ياقف لاوصل سلطان

ويعيش أمير العاصمه راع الوفاء
سلمان كل ٍ يشهد لسلمان

أمير عاصمة البلاد الحبيبه
ورجل ٍ يليّن قاسي العيدان

وأمير مكه عز الله وثابه
حل المشاكل بين كل اثنان

يعيش أبو مشعل عسى الله ينصره
ويعيش من يحكم بحكم أمان

ونايف وزير الداخليه عادل
نايف على إسمه نايف الشجعان

وبقية الأسره عسى الله يعزهم
والله ينصرهم على العدوان

لاداع أمدحهم وكل ٍخضع لهم
والكل منهم مخلبه طعّان

عيال حر ٍ صاطي ٍمخلابه
من ضربته تتسايل الدمّان

والمملكه هي أمنا نعتني بها
وعيال مقرن همّه العمان

هم يصدرون الأمر وحنا ننفذ
والبيت ماياقف بلا عمدان

دون الملك والشعب نرخص أرواحنا
ومن خان شعبه خانه الرحمان

هذي أمانه فوق عنق ابن ادم
ومن خاف ربه للأمانه صان

لامفتخر بالقول ولا أبالغ
قلت الصراحه والصحيح يبان

قلته وأنا من لابه معروفه
تشهد معي بفعولها العربان

قبيلتي كل ٍ عرف ماضيها
تشهد لها الأجناب والخلان

ربعي سبيع ومحزمي وسنادي
أفخربهم في ساحة الميدان

قسم نزل برماح وأهل الحاير
والقسم الاخر ينزل الوديان

بذكر مكارمهم وبذكرفعولهم
والأوله نبدأ من الوديان

منهم مجامعة ٍعلى اللين والقسى
ترسي إلى من عسكر الدخان

ألاد المجمع سعد من يعتزي بها
ضد الحريب وتكرم الضيفان

أما العدوعليه شر ٍمنزل
مثل النجوم اللي على ضلعان

ومنا الملوح اللي توسع طعونها
عدوها منها يجيه اجنان

ألاد مالح باللقاء صيرميه
يـقــولها اللـي كـلـمـتـه مـيـزان

ومنا الجهوم اللي جزال ٍفعولها
من طمع فيها ردتـه خسـران

ومنا الحميديه عما كل عايل
سعد الرفيق وتلطم العدوان

ألاد الحميدي فعلها شاهد ٍ لها
ولها على وكر الشداد مكان

ومنا المراغين السباع الفارسه
ووزراننا يانعم بالوزران

ومنا الشماسات الرجال الوافيه
حريبها دايم وهو سهران

شمس ٍ على قلب العدو الطامع
عقب الطمع يرجع وهو ندمان

ومنا بني سوّاد نعم اللابه
ألاد السويدي لابة ٍ ظفران

همه هل البل لاهل البل غيرهم
ياكم شعوا يوم الجهل قطعان

ومنا فراعنة توّطيٍ عدوها
وتشب بكبود العدا نيران

الاد ابن فرعون يقمح عدوها
تغدي عداها باللقاء شتّان

فراعنه بين العرب مشهوره
عند الجهام ترخّص الأبدان

وألا العميري أهل الشرف مانسيتها
والصندلي فعله على برهان

ماحد ٍ تهقوا به ولاحد ٍهازه
ياكود من ساقه نصيبه شان

وألاد إبن مشعب عسام العايل
المشعبي في المعركه فتّان

مشاعبه يشهد لها ماضيها
قوم ٍ تشيل الراس من الأمتان

وألاد إبن مكحل أسود الغابه
مكاحله لاصملوا عيّان

نار ٍ على العايل تواقد لهيبها
وغيث ٍ على الأقراب والجيران

وألاد إبن مفلح محابيل العداء
حريبها يرجع وهو إمهان

مفالحه كل ٍ يهاب رجالها سم ٍ
على كبد الحريب اصنان

ومنا الرجال اللي تضد المعادي
ألاد الرويبي فعلها ماهان

ألاد الرويبي محتمين الهيه
رجالهم يثني وراء السلفان

وربعي هل الخرمه حمّاية الوادي
لانيب ناسيهم ولا غلطان

ألاد صامل صاملين الهده
وفعولهم عندي لها ثبتان

وأميرهم شبّاب ضد الجاني
شيخ ٍ توطى هيبة الشيخان

كاسر أسود الضاريه بالغنايم
سبع السباع وفارس الفرسان

وبني عمرلاجت تحدى وتحتدي
مثل المخيل معذب الربّان

يمطر برد مافيه قطرة ميه
إلى أقبل مخيله للرعد دندان

كل ٍ يقول الله يحيله عنا
مروفتك يالله يارحمان

عمريه مثل الصواعق من السماء
في راي قايدهم إبن عبيدان

وألاد العسيلي مثل سيل ٍ إلى إنتحى
من قوسيله يركب الجيان

يفجر محانيب المسايل بقوته
ويشيل مايطى من البنيان

وألاد الأجرب ماحد ٍزحزحهم
قوم ٍ تكف طماعة الطمعان

والى اعتزوا دون المجاهيم سبلوا
بارواحهم في حسمة الذيدان

لاصاح صايحهم يجونك جنودهم
ولاناحروا لا كنهم عميان

نطاحة الماص الحمر حزت اللقاء
بحد السيوف وصافي النيشان

وربعي هل الوديان كسّابة الثناء
تحمى الجهام وتحتمي الحدان

وحدودنا يم الجنوب موسّعه
بيشة نصيفة نزلها السبعان

وحدودنا العرقين من شرق البلد
وأيضاوراها أملاك وأيضا أوطان

ويم الشمال حدودنا مخفوره
يحدنا خنثل عن العتبان

وحدودنا من غربها معروفه
وادي كراء حد ٍعن البقمان

هذي حدود سبيع ماحد ٍ رعى بها
حامينها من خلقوا الجدان

ربعي هل الغلباء وهي عزوتنا
و لنا بني عم لهم مكان

نزالة برماح والرمحيه
خذوها غصب ٍوالعدو امهان

ماهوب ورث أباهم وأجدادهم
ربعي خذوها بطولة الأيمان

مشوا من الخرمه على وقت الجهل
ثم حدروا مع نجد والجيان

ثم إستقروا يم ذيك الديره
وأصبح لهم في جوها مسكان

بسيوفهم ورماحهم بتاعه
تاخذ وتعطي مع هل الحقان

همه محازمنا وحنا عضودهم
ولو فرقتنا الدارفإنّا اخوان

مانغتني عنهم وهمه كذلك
ولا يمتكن من بيننا نسيان

بذكر بدايدهم وبذكر طيبهم
وأدخل على ربي من البهتان

منهم عرينات ٍ تراوع به العداء
لاجاء اللقاء وإصطكت الجيلان

ألاد العريني محتمين التالي
تشهد لها الاجناب والصدقان

كم فرقوا من جادل ٍ عن خليلها
ودموعها هلت على الأوجان

وكم سربة ٍ يوم اللقاء عيدوا بها
فوق المهار وكل أصيل حصان

يانعم يالاد العريني وأفتخر
بأفعالكم لاحنّت الحيران

ومنهم عوامرة ٍ مطوعة الصعب
حريبها يصبح لها مرسان

حريبها دايم بقلبه عله
مايستلذ النوم من الاحزان

عوامره كل ٍيهاب ا رجالها
من ضربها ماتسلم الأكوان

ياكم خذوا ذود ٍعلى وضح النقاء
والعامري كسبه ماهوب خيان

ينطح وجيه الخيل لاناحروا بها
ويلحق على اللي كنها شيهان

وسم ٍ ذحاح ٍزايد ٍحنظليله
على عدوه دفقة الثعبان

وغيث على الجيران والضيف والخوي
ومن الصخى يذبح سمين الضان

ومن ربعي العزه هل العز والشرف
قولي صحيح ولا عليه اغشان

قبيلة العزه لها ماضيها
واليوم حاضرها مثل ماكان

تاريخهم يشهد لهم بالطوله
وإلى إعتزوا فان إسمهم عزوان

يانعم بالعزه عسى الله يعزهم
شر ٍ على اللي غزه الشيطان

العزه إسم وقسم والله قسم لهم
وأفعالهم بين الرجال اسمان

ومن فعلهم ياوقعة ٍبالحاير
سمي بها الحاير عقب ماكان

ومن ضمنها سيف الشجيع الصامل
اللي فلق قروٍو وروس اثنان

قطع رقاب الترك في ميراده
سيف ٍيداوي علة الوجعان

حده وريع ومن ضربه صامل
يبرد طنى من خاطره طنيان

والى ذكرت فعولهم تشفيني
فعل ٍ يطيولني وأنا طربان

ولو كنت أعد فعولهم مااحصيها
الله يرحم شيخهم جفران

شيخ ٍ جميع الناس تعرف طيبه
ولوغاب نجم النجم الاخر بان

ومنهم جمالين ٍ يجّمل فعلها
يانعم والله وأمدح الجملان

شر ٍ على اللي حايشه مقروده
على العداء كنهم رحى طحّان

تكسر زمام القوم في ميراده
تبقم وتدقـم شوكـة الـحـدمان

وإن كنت اماري يطلقون الساني
فعل ٍحقيقي يشفي السقمان

وباقي قبايلهم فلومانعدها
فعولها مثل الفجر بدران

كل ٍ عرف عنها وكل ٍ درابها
الحضر واللي ينزل البران

جواسة ٍ نواسة ٍ حساسه
تضوي اعداها ضوية السرحان

ربعي بني عمر وألاد عامر
قبايل ٍ يرجح لها الميزان

قبايل نفخر الى حل ذكرها
ياكم رموا من مشرك وخوان

وياكم قزى في وردهم من سربه
شي ٍ يشيّب جاهل الغران

خيالة يوم اللقاء مشهوره
فريسها تخضع لها الفرسان

وإن جاء الكرم ربعي هل المثلوثه
سعد الغريب الى لفى ضرمان

وإن جاء بعز الجار ياسعد جارهم
قصيرهم يدعى على الخرفان

وإن جاهم المحتاج يلقى حاجته
لاشك مافي لابتي نقصان

مدحت ربعي ماعليّه لايم
ومن لامني جعله لهم حذيان

من بعدها يالابتي ياعزوتي
ياسبيع ماخصيت شخص فلان

أرجو السموحه كان فيها قاصر
مايكمل إلا الله عظيم الشان

فعولكم ماوالله احصي عدادها
وخذيت ماضيها من الشيبان

ومن بعدهاباذكر فعول القبايل
واخصهم بالفعل والبيان

قبايل في المملكه مشهوره
نشهدلها بالسر والاعلان

في كل دار حقها من رجالها
والاوله تختص بقحطان

قبيلة يوم الجهل معروفه
وافعالها مضمونة ضمان

من بعدهم شمرهل العز والشرف
شمر جمال الشيل بالوكدان

اقولهاوالله على مااقوله
الشمري يدين ما يندان

اما عنزه من ماضي الدهرواخره
قوم تهدم سيد الحيطان

قلت عنزه واقول نعم اللابه
من ساس وايل نعم بالويلان

وقبيلة العجمان لاوصل عدها
ياويل من تلوي به العجمان

قبيلة منها الشجيع الفارس
ياجاهلين اسمه فهو راكان

واما الدواسرناطحين الغاير
ماهم بيوم اللقاء شردان

وبني رشيد اهل اليدين الطليقه
ياكم فرقوا من جملة الخلان

لاجاء نهار فيه عدل ومايل
بين العزاوي هن والاديان

اما بني مره فمر حالي
مروين حد المرهفات سنان

اما الظفير مظفرت من عنالها
قوم على الجيره لهم حنان

واماالسهول اهل الفعول الوافيه
اللي وردهم راجع ضميان

لادارهم ذيب العشاء ما صادهم
يدوج ويعود وهو جيعان

والادالعتيبي هل فعول قديمه
لاثار عج وكاضمات عنان

ذباحة الحايل عسام العايل
الاد العتيبي لابة ظفران

محدن دخل حد العتيبي وهازه
الا عقب ما ياخذ استئذان

اماقبايل حرب لاوصل عدها
تشهد معي بفعولها البدوان

نطاحة البارود ساعة يحتمي
وفعولها بنين على سيسان

ومطير لاجت بالزعل والتحدي
كل القبايل خافت المطران

واذكر بلي بلوا على كل عايل
واما جهينة فاعرف الجهنان

اهل الجمايل في نهار الدبايل
في ظلهم تريح الرعيان

وسليم ما حي رعى بحماها
ولا كل جمع ينطح السلمان

وبني عطيه محتمين الرديه
لاجاء نهار يفخر الكسلان

واماالشراري بالشجاعه يماري
وفعولهم يثبت لها وجدان

والحارثي محراث نار حاميه
وهذيل لاعدو مع العمران

وغامد الى عدوا رجال الشجاعه
رجالهم ياتيك لو حفيان

وان سلت عن الاشراف لاوصل ثقلهم
هم الرجال اللي لهم عنوان

يانعم يالاشراف وانتم هل الشرف
ولا يجحد الشجعان كود هدان

اماالبقوم اللي تعرف العاني
سم على كبد المعادي لان

امابني شهران لاوصل عدها
فالناس كل يعرف اشهران

اما قبيلة يام يوم المعارك
ياكم غدى في دقلهم هموان

وعسير عسرين على من هازهم
كم واحد من ضربهم خمدان

والاحمري والاسمري والقرني
منهم الى حتى بني زهران

اما بني مالك فهي معروفه
والبارقيه هم واهل جيزان

اما بني شهر لاوصل دورهم
ذكرتهم بالفعل مع شمران

وياناس ياللي ماذكرت اسماكم
والله ماخليتكم حقران

وهذا الذي قلته وعد الساني
ارجوالمغفره منك يارحمان

الله يغفر مامضى من ذنوبي
ارجيه ماغيره لنا لجوان

صح لسان الشاعر وبيض الله وجهه والسلام ختام لكل مايحبه الله ويرضاه

[السبيعي]

الله الله
مااروع هذه القصيده
عز الله انها ملحمه
رائعه
وصح لسان شاعرها المجمعي
وشكرا ايها الناقل

[مشاكس الفيحاني]

صح لسان الشاعر



وبيض الله وجهك يا خيال الغلباء




تحياتي

[الفياحين]

صح لسان شاعرها ويسلم ناقلها

[خيال الغلباء]

اخواني الكرام السبيعي ومشاكس والفياحين بعد السلام اشكركم على المرور بملحمة قبائل سبيع الغلباء صح لسان الشاعر الكبير مسند بن سعود المجمعي السبيعي وانتم سالمين وغانمين والسلام

[خيال الغلباء]

بسم الله الرحمن الرحيم

هذه ملحمة الشاعر الشاب محمد بن مقعد السوده السبيعي في قبائل سبيع بن عامر الغلباء

بسم الكريم اللي عليه اتكالي
= الواحد الوهاب رب الجلالي

الدايم اللي ما يجيه الزوالي
= الاهنا المعبود ملاك الاكوان

ابدى قصيدي و اجتهد بالتواصيف
= اوصاف حق(ن)مالحقها تخاريف

في اللابة اللي مجدها سنه السيف
= اعيال عامر لاحمى الوقت شجعان

اعيال عامر عزهم فايق الناس
= فوق النجوم و هيبته ترفع الراس

شامخ و لاهزه صعاليك و انجاس
= عليا هوازن من ضنا قيس عيلان

ربعي هل الطوله ليا عكر الجو
= منهم زحازيح العرب ما تسجّو

من باس ربعي روس الاقوام هجّوا
= يا معاند السبعان لا شك خسران

و ياللي تبي تفصيل ببدى بتفصيل
= هاك الوصوف و حلل الوصف تحليل

اربع بطون و كلبوهم حلاحيل
= نالوا الفخر وافي و لا فيه نقصان

منهم زكورن بالوغى تكسر الحوم
= منهو سمع طرياهم يقول معلوم

هذول ربع الطيب و المرجله دوم
= اهل الكرم و الجود و السيف شامان

و العامري بالطيب لا مانسيناه
= و سهيل معروف(ن)وصعب نتعداه

العامري ما خاب منهو ترجاه
= بالطيب جايد دون شكرن و عرفان

و يمنى بني عْـمرْ بالفخر تعتلي فوق
= كم فارس(ن)من ضربهم صابه العوق

و الجار له في سلمهم دايم حقوق
= يبقى بطول الوقت شامخ و لا هان

و ذولا بني عْـمير الوفاء و المروات
= اهل الفعايل و السيوف الصقيلات

رجالهم ما هاب نطح الصعيبات
= ينطح شعيب الموت لو كان مليان

و تحت البطون اذكر وصايف قبايل
= منهم زحول المجد تشكي الهوايل

سادوا بنجد الطيب باروع فعايل
= هذا كلام الحق ما هوب بهتان

من الزكور اذكر عيال القريشي
= عدوهم يمسي بقلبه خريشي

كم شيخ قوم(ن)راح راسه طشيشي
= من فعلهم لا من غشا الجو دخان

و عيال ثور العز ربع الجزيلات
= اهل الكرم و الجود و اهل الحميات

رجالهم يثبت ثبات السراوات
= من القرامه لا حمى الوقت سكران

ايضا و لا انسى بالفخر لابة سويد
= صنديدهم ينطح ثلاثين صنديد

يوم المعارك عندهم كنه العيد
= و وقت الرخا للجود عز(ن)و عنوان

و خيالة الشرفا عيال الحميدي
= عزومهم صلبة سواة الحديدي

الوصف فيهم بالمزايا فريدي
= طيب المزايا عمت طيور حوران

و جود الشماسي بالمدى فايق الحد
= فالعد يتعب راعي العد بالعد

ضد المعادي عزمهم كنه السد
= عاداتهم للطيب و البذل نيشان

الف و نعم مليون صيت الرويبي
= كم فارس(ن)ضرغام منهم عطيبي

في جنبهم يامن جناب الغريبي
= و يبدل الضيقه بسعد(ن)و سلوان

و فريعني بالطيب وافي المزايا
= اهل الكرم و الجود و اهل العطايا

رجالهم ينطح سهوم المنايا
= لا جيت باوصفهم كما الذيب سرحان

و مجمَعي راع الصفات الحميده
= في الطيب و النوماس يا جيد جيده

في ساحة الاجواد عالي رصيده
= و عدوهم ما نال يا كود خذلان

و ياللي تبي الخوه هذول المراغين
= ربع(ن)على مر الزمن دوم صلفين

بغالي الاثمان للجود شارين
= طبع الفتى فيهم و لو مات ما خان

و اهل الوفاء وقت الشدايد ليا جن
= ناس(ن)تسن الطيب في دربها سن

رجالهم لامن فزع ما رجع من
= اهل الحميه و الوفاء دوم وزران

و الطيب ما ينقص جموع الجهومي
= الغالبين الراجحين القرومي

رجالهم بالهوش يقضي اللزومي
= وصف الفتى فيهم كما طير شيهان

و ملوح مثل الضلع بالعز راسين
= وافين لاجا اللين بالطيب وافين

و وقت القسا و الجور لاشك قاسين
= ما يخلفون الظن لو كان ما كان

ذول الزكور و تم وصفي و قولي
= و الدور للي بالمواقف بطولي

العامري للمجد دايم يطولي
= ما فيه مثله بالشدايد كحيلان

منهم عيادين(ن)على الهوش ضارين
= و يا كنهم للطيب ربع(ن)موالين

ما فيه بين الناس مثل العيادين
= في جودهم يلفون باصناف و الوان

و اهل الكرم و الجود لو هو كليفي
= رجالهم بالطيب ماله وصيفي

عدوهم يمسي بقلبه رجيفي
= دوم و نعم مليون بعيال صيفان

و اهل المراجل و الكرامه بني حْـميد
= رصيدهم بالطيب من دون تحديد

ناس(ن)على حوض المنايا مواريد
= و الخوف عن رجالهم دوم شتان

و قواوده للطيب و البذل نوماس
= رجالهم معروف بالجود و الباس

و الساس ياطيبه يالاجواد من ساس
= ساس الوفاء ساس الرجوله و الاحسان

و خيالة الهدلا نهار التحدي
= عزومهم فوق العوالي تعدي

و اللي تحداهم عزومه تهدي
= ذا بالعَجم لامن زعل كنـْـه طوفان

و الطيب بالقدعا يفوق الوصايف
= وقت الوغى كم فرقوا من ولايف

و عند الشدايد هم ذرا كل خايف
= امشيدين المجد ثابت بالاركان

و ابن الضعيفي بالمواجيب كامل
= طبع الفتي فيهم على المجد صامل

و في الطيب منهاجه ليا من تعامل
= و وقت المعارك يشعل الجو نيران

و الطيب كله و المراجل بني عْمـر
= ناس(ن)تحوش المجد في كل مضمر

و رجالهم منصور لا من تشمّـر
= في حزة الشدات و النايبه بان

منهم جبور(ن)يعشقون العوالي
= ما فيهم اللي مركبه بالتوالي

و ان كان نرجع للسنين الخوالي
= لا ثارت الهيجا فلاشك ظفران

و ياحي صيت الطيب صيت المديري
= رجالهم ضربه بسيف(ن) شطيري

كم شيخ قوم(ن) عقب عزه كسيري
= حظه رماه الشين في وسط بركان

و طاري العزيزي لا ذكر طاري الذيب
= هَـل الوفاء و الجود و اهل المواجيب

عدوهم مطواع غصب(ن)بلا طيب
= يرجح فخرهم لاتقارن بميزان

و ان كان تبغى المجد دوك العرينات
= رجالهم يحتال شيل الثقيلات

مرقاه دايم فوق روس الطويلات
= طبع الفتى فيهم يجي عالي الشان

و خيالة العشوا و سقم المعادين
= ريف الكرم و الطيب قوم الجمالين

في حزة الهيات مثل المجانين
= يا كنّـهم للموت ربعن و خلان

و مليح تلقى الجود و البذل بمليح
= اللي لهم في ساحة المجد ترجيح

ناس(ن)تحوش الطيب حوش الزحازيح
= و تارد على حوض الفخر ورد ظميان

و صيت الفخر و العز صيت الصميلي
= في فزعته لا شك ماله مثيلي

لو كان ما يملك يا كود القليلي
= ما يحسبون المال ذربين الايمان

و ابن العلي بالطيب كامل و وافي
= لا من نخي لا هو كريم(ن)سنافي

و فعل العلي بالكون ما هوب خافي
= ضرب الفتى فيهم يجي بين حجان

و صيت النبيطي بالفخر ماله اشباه
= طبعه يجي فوق السحب دوم مرقاه

اهل الكرم و السيف لا حل مدعاه
= نالوا الفخر و العز في كل ميدان

و المجد و النوماس تاجه بني عْـمير
= و الوصف فيهم و المعاني تجي غير

من ضربهم كم شبّعوا حايم الطير
= وفي حزة المدات بلعون كرمان

منهم نديم الجود راع الجزايل
= مفيلحي طايل على كل طايل

في صفحة التاريخ تكتب مثايل
= للي كرمهم وافي(ن)دون نكران

و الصندلي ناخيه يبشر بفزعه
= و ياسعد منهو باللقا ذول ربعه

سمعة كرمهم و الوفاء طيب سمعه
= منهاجهم ثابت على مر الازمان

و المكحلي يا زين طاريه زيناه
= مثل القصر شامخ على الدوم مبناه

دوم و نعم تنقال لا حل طرياه
= و في حزة الاكوان ما هم بذلان

و المشعبي راع العوالي على طول
= و ياللي نشدت اتقول هاذول وش ذول

ذول الفتى فيهم اذا ضاق مسطول
= من القرامه لاقفل كنْه شيطان

و هذي قبايل في ذراها حمايل
= غير الفخايذ و الاسر و العوايل

ذولا هل الغلباء و نعم السلايل
= تشهد لهم قبل الاصاحيب عدوان

حنا سبيع اللي نطوّع عدانا
= و نفزع لمنهو بالشدايد لفانا

و حنا سبيع اللي بعيد(ن)مدانا
= لنا بدرب المجد مسهم و سلطان

فقيرنا كنـّه ملك مال قارون
= يعطي و لو حاله تجي دون في دون

أَجل هل الاموال بالجود وشلون
= ناس(ن)عطاياهم كما هل ودان

اهل الكرم و الجود صبيان غلبا
= خذنا المكارم و التنوماس غصبا

كم راس شيخ(ن)لا زعلنا تدربا
= لا من تعزوينا فلا شك فرسان

هذا و لانكر بالجزيره قبيله
= كل(ن)خذا عند المراجل حصيله

اوصافهم بالطيب ما هي قليله
= نالوا الفخر وافي و لا فيه جحدان

حنا الحرار الساميه و الشهيره
= عند الوغى حنا السيوف الشطيره

و كل القبايل درع يحمي الجزيره
= و لا تاقف السيسان من دون عمدان

هذا و صلوا عدّ دورات الايام
= و عدّ البشر و اعداد ما طاير(ن)حام

على الذي بالطيب هو خير الاقوام
= على النبي الهاشمي نسل عدنان

صح لسان الشاعر الشاب : محمد بن مقعد السوده السبيعي منقول و انتم سالمين و غانمين و السلام

[مشاكس الفيحاني]

ونعم فيك وبا الشاعر الشاب محمد بن مقعد السوده السبيعي

الله لايهينك على النقل

تحياتي

[خيال الغلباء]

اخي الكريم مشاكس الفيحاني بعد السلام شكرا جزيلا لك على المرور و الف نعم فيك و في لابتك و اسلم و سلم و السلام

[خيال الغلباء]

بسم الله الرحمن الرحيم

هذه الملحمة من القصائد الخالدة في ذكر امجاد قبيلة سبيع بن عامر الغلباء لشاعر سبيع الغلباء الكبير دسمان بن مناحي المحمدي السبيعي بيض الله وجهه وصح لسانه وسلم بنانه

ابدا بذكر الله رفيع المقامي
= هو السلام ومنه يبدا السلامي

المقتدر محيي هميد العظامي
= وبشايته تصوير الانفس والاجساد

المطلع علام مافي الخفايا
= وعن خاينة الاعين وسر النوايا

رب الفلق محصي جموع البرايا
= جميع مافي الكون عنده بتعداد

الهنا اللي مالنا غيره اله
= معبودنا ماغيره احد عبدناه

كل الامال معلقات برجواه
= حنا عبيد له اركوع وسجاد

سامع دبيب النمل فوق الحيودي
= فوق الحيود السود والنمل سودي

في ليلة سوداء عربها رقودي
= الا خطيب ضارين بالتهجاد

اللي فتق سبع السموات فتقا
= من بعد ماكانت مع الارض رتقا

يالله عسانا من بلاويك عتقا
= في ساعة يكثر بها عض الانجاد

ياحي ياقيوم ياعالم الغيب
= ياواقي العثرة وياساتر العيب

تلطف بمن سالك ومن جودك تجيب
= انت الذي بامرك تصاريف الانواد

يافالق الحبة ويارافع الطير
= يامنزل الماء من مزون مزابير

ياخير من يجزي هل الخير بالخير
= ياباعث الانسان من تحت الالحاد

ياخالق الجنة وياخالق النار
= للجنة ابرار وللنار فجار

ميزان عدل وكل شئ بمقدار
= منك الطغاة مقرنين بالاصفاد

يامهلك فرعون يامهلك عاد
= يامهلك اللي جابوا الصخر بالواد

انت لهم يوم الملاقى بمرصاد
= وبالريح دمرت ايراما ذات الاعماد

مجري سفينة نوح من فوق طوفان
= اللي عليها اثنان من كل زوجان

ارست على الجودي وكان الذي كان
= في حكمة اللي عالم غيب الارصاد

يامقدر الاجال ياعالم الحال
= حنا تحت رحمتك في يوم الاهوال

في يوم لاينفع بنين ولامال
= يكود من قلبه سليم وعباد

عباد للي يعلم الكائنات
= يرجي ثواب منزل المحكمات

ايات حق وكلهن معجزات
= ترتيلهن يغني عن الشرب والزاد

باسمك بدينا القاف وابك استعنا
= ولاقط في غرات مسلم طعنا

ولانتبع المقفي ليا صد عنا
= تبت يد اللي للمقفين نشاد

من بعد ذا عندي بمجد القبيله
= نوادر ماهي علينا دخيله

يكفي عن الهرج المطول قليله
= ان ما نقص هرجي عن الصدق مازاد

حنا سبيع مطوعين الخصومي
= وحنا سبيع موردين السهومي

وحنا سبيع اللي سعدنا يقومي
= ينهض سعدنا لاتردن الاسعاد

سبعان لاقالوا على الخيل سبعان
= من ماضي الدنيا هل سنان وعنان

نمشي بقو الزند والسيف شامان
= ريف القصير وللعدا سم الاكباد

ياما خذينا من حفيف قلاعه
= لاطار عن وجه المزين قناعه

يسوقنا زود الدجر والشجاعه
= ياما كسبناها صباح ومهجاد

حنا ليا منا نوينا بعدوه
= مانجعل الدخان للنصر قدوه

كلن نسوقه لين نقصيه مدوه
= نتعب ظهور الخيل ونطول الاماد

كم خايع قفر نجيه ونعسه
= وكم طارفة قوم قلعنا مرسه

يبطي وهو منا صوابه بنسه
= لاذاق منا ملحة الحرب ماعاد

سقم الخصوم مبعدين المشاحي
= مروين حد مكعبات الرماح

كسابة الطالة نهار الصياحي
= واليا عطينا الوعد نوفي بالاوعاد

دواسة الجمع المناحر ليا هيب
= بالخيل والسلة وسرد محاديب

ومذلقات يوسعن المضاريب
= والجبخان وضرب صلفين الاولاد

نبيد جمع معسكرات السرايا
= ونشوش فوق المكرمات السبايا

لاغردن بالصوت بيض الصبايا
= نفضا الجموع لعين مركوز الانهاد

تلمنا الغلباء وحنا قبايل
= قبايل يذري ذراها قبايل

من طيبهم طالوا على كل طايل
= ساس المعرفه والمروه والامجاد

مانقطع الساقه ولاناكل السور
= ولانذبح الغافل ولانشهد الزور

ولاننقل النمه ولانجحد النور
= ولانوقت الساعه لغراة الاجواد

حنا هل الشيمه بعيدين الانظار
= مانزعل العاني ولانزعل الجار

ليا هفت ملة قصيرين الاشبار
= انفوسنا ماهي دنياة وازهاد

حنا هل الردات لاصاح صايح
= ليا غدت جرد السبايا سبايح

كسابة الطالة نهار المدايح
= نرجع ونسقي خصمنا مر الاكباد

نمشي مع البيرق عضود الامامي
= شرق وغرب وفي جنوب وشامي

بياعة الارواح يوم الزحامي
= قوم على حرابنا علة فؤاد

تشهد لنا البيداء ويشهد لنا الجيش
= وصنع اليهود معكفات النواتيش

وسيوف هند في يدين المداغيش
= تشهد لنا نطاقة الصاد والضاد

ناطا الحما في شف سجح الخلايا
= جرد الرقاب مبعدات الهوايا

وان قامت الاعداء علينا حمايا
= ندوس غبات الخطر جد واعناد

نفرح بفنجال المبارز ليا سيق
= لوكان هو صعب ومر اليا ذيق

ويفرح بنا المضهود في ساعة الضيق
= نبوج عنه الظلم والنور ينقاد

دخيلنا يامن وتامن جواده
= عام وشهرين وعشر زياده

نفرض على طلابته فرض اراده
= وحنا لمن يلجا لنا كن وبراد

تامن بنا حمر الشعاف المصاغير
= نرعا بها بالخوف وقت المخاضير

ونظمي بها في نازحات المصادير
= واللي يبينا لاعرف وسمنا حاد

احسن محل في الجزيره خذيناه
= بمثمر لاصادم العظم يشظاه

من فوق حيل للمطارد مضراه
= ويدرا خطرنا اللي ورا حد الاكراد

حنا هل الغلباء واهل الجهامه
= وعرق حمينا فيه بيض النعامه

وايضا خذينا عصب نجد وسنامه
= ولاجاء لنا الا عقب غارات وطراد

خذنا من العارض ليا جو عوجان
= بالسيف ماجتنا بتسليم الاثمان

دار لهزعات المراقيب مقطان
= تسمن بها شيب القرا قبل الاذواد

زحنا صناديد الاشاويس عنها
= بمشوك كن السحايب دخنها

حتى ثنينا في يدينا رسنها
= من فضل رب للمخاليق جواد

كم ضربة منا تفج الترايب
= وكم ذود مصلاح نجيبه غصايب

وكم مربع سقنا عليه الركايب
= يلقى لها مع صحصح الخبت مرجاد

واليا غزونا ناقلين البواريد
= يبغون حلوات اللبن شمخ القيد

هذاك يوم عندنا كنه العيد
= يوم التشابك عندنا مثل الاعياد

نفرح بهم فرحة قريب بقربه
= اليا تحلا ديرته عقب غربه

وانفك له من شوف الاقراب كربه
= ومحقق في غربته كل ماراد

نذبح مذربهم ونلثم شباهم
= ويطيح بيرقهم ويظلم سماهم

ونحطهم عبره لقوم وراهم
= يمسون فوق كبودهم مثل الاوتاد

ناخذ على الخيل الاصايل عجاريف
= بالرمح والمزروع والدرع والسيف

نولف مفرق ونفرق مواليف
= وحرابنا نقطع هجومه والامداد

كم واحد ينقل علينا ضغينه
= طويلن لسانه قصيره يمينه

في كل سبل المرجله غالبينه
= في خشمه خطام وفي رجله قياد

نرفع كرامتنا عن الهرج لاراب
= ولانندفع في ساقة النجم لاغاب

ولاندعي وسط المجالس بالاكذاب
= للخير حصاد وللشر حصاد

مانستمع لمحرفين السوالف
= هذارة المجلس وجيه المكالف

اللي لها اعراض الاوادم معالف
= ولاهمنا مغرض ولا قول حساد

هذي مزايانا وهذا فخرنا
= سون على صف المحارب خطرنا

ننزل ديار اخصامنا مع ديرنا
= بمصقل ينزل على المتن قداد

عديت فعل مخرقين الطوابير
= مخضبة حدب السيوف البواتير

ان فرحوا الصدقان خير على خير
= وان كضمت خطر هل الغيض وش عاد

موجز وفي بعض العلوم اختصرنا
= ديره هدمناها وديره عمرنا

بيض صحايفنا بعيد نظرنا
= علم عليه الله والاجواد شهاد

من دون نقص في حقوق القبايل
= مروين حد مفتقات السلايل

يوم المشاكل والخطر والدبايل
= ومصادم الدنيا بخفخاف وزناد

قبايل فوق الجزيره مقيمه
= ولهم تواريخ وقيمه وشيمه

تقاسموا ثم ارتضوا بالقسيمه
= ومن جاد حظه مع ظروف الدهر جاد

قبايل مااحد يقف في نصدها
= جبع محازمها كثير عددها

توعد وتوفي في المواقف وعدها
= امجادهم تذكر قديمات واجداد

ذكرتهم من دون عد وتخصيص
= اخاف من هرج يجي فيه تنقيص

للعلم باب وللخطايا قوانيص
= وانا عن الزله احب التركاد

والحضر صافين القلوب المشاكيل
= سم تغلغل في القلوب المغاليل

تسمع بناديهم للاذكار تهليل
= اهل سفرة تندل واهل بن وقناد

للمعرفه والخير فيهم مواري
= رجالهم في بذل الاحسان ضاري

حديث مسلم عندهم والبخاري
= والنصح منهجهم والافتاء والارشاد

واليوم في نعمه وحكم السعودي
= والراية الخضراء براس العمودي

والعود يكسر في عيون الحسودي
= امن وامان ونعمة واكل ورقاد

كلن تحت فية علمهم يفلي
= حج الجمل وانكف وصلى المصلي

وتبدلت كوخ الكواويخ زلي
= وعاشوا بظل الامن والخير يزداد

شعب جعلنا الله للاسلام خدام
= واظهر لتصريف امرنا خير الانام

اختارهم رب السماوات حكام
= ولموا شتات الشعب عقب التشراد

راحت عصور الظلم مع فايت فات
= والسلب في ايام الجهل والقوامات

والشرك وانواع البدع والخرافات
= وتوقفت عنا قواميس الالحاد

فضل من المولى عزيز الجلالا
= ثم السعود مخضبين السلالا

كواكب فوق الجزيره تلالا
= خير على الخير وضد للاضداد

مدوا حبال الامن في كل ديره
= واستاصلوا عنا الخيوط الشريره

يفخر بهم سكان شبه الجزيره
= سادوا على من قبلهم كانوا اسياد

حطوا لهم في عالية نجد حجري
= في الف وميه وسبع وخمسين هجري

بشلفا ومصقول وبن ونجري
= وعلم ودين وضرب مسقوف واشداد

من ذلك التاريخ لليوم حكام
= ومواكبين سبق الركب قدام

شر على الظالم ونصر للاسلام
= بذالة المعروف خطلان الاياد

ترجمت فحوى الهاجس اللي طرا لي
= مثلي مثل غيري وجالي مجالي

لانيب انا الاول ولانيب تالي
= لي مع ورود الماء مقام وميراد

عبرت عن ما في ضميري يجولي
= وموثق بالمستندات قولي

قول على حسب الثقه والاصولي
= متحفظ عن كل شاعر وقصاد

مثايل تبقى على طول الازمان
= يعرف لها من بين الاشعار عنوان

ابغي ليا من قيل وش قال دسمان
= ارضيك ياللي للشعاعير نقاد

اقولها مانيب ادور عطايا
= ولاابغي من التاجر فلوس وهدايا

ولاارجي من العالم كفية بلايا
= مااحد يريد ووالي العرش مااراد

هذي عدد وقفاتها اربعمية بيت
= خصيص في مجد القبيلة ولا افويت

وعلى محمد سيد الرسل صليت
= المستقيم الناصح المرشد الهاد

ازكى صلاة عد ما هل همال
= وماغرد القمري على روس الاقذال

على الشفيع بيوم تقسيم الاعمال
= اللي يصلي والمخاليق هجاد

صح لسان ابو ثواب وانتم سالمين وغانمين والسلام