قصائد في مآثر قبيلة بني ثور من سبيع

[عبدالله الحضبي السبيعي]

قال الشاعر عبدالله بن سعد الحضبي الثوري السبيعي





جل منهو خلقنا مـن تـراب
والأوادم يعـرف اسرارهـا
ياعريب النسب خذ لك جواب
عن بني ثور هاك اخبارهـا
عزوتي جالهم فعـل يهـاب
يكرمون الغريب ان زارهـا
محتمين العوج شيب وشباب
وادي سبيـع بيّـن كـارهـا
نحتمي بالسيوف وبالحـراب
يوم عدل السنيـن وجورهـا
فعلنا فوق هامـات السحـاب
و المعادي يـذوق امرارهـا
يوم عج الرمك مثل الضباب
كم عقيدٍ نـزل مـن كورهـا
من عصور البنادق والركاب
والمنـازل خذينـا خيارهـا
الشجيعين سمحيـن الجنـاب
عزوتن ماتضيـع اشوارهـا
غرسنا راسين بيـن العِـذاب
وابلنـا ترتعـي بقفـارهـا
والجبال المنيفـه والشعـاب
اسمهـا بسمنـا وآثـارهـا
فـي وطنـا سكنـا مانهـاب
والدلايـل رسـوس بيارهـا
مانزلنـا بعانـي واغتـراب
لابتـي حافظيـن اسوارهـا
المناعيـر معْتقـت الرقـاب
كل ربعي عزيـزن جارهـا
ماعرفنـا تميـمٍ والـربـاب
دارهـم ماجنينـا اثمـارهـا
مانذم الرجال اهـل اللبـاب
ميـر ماإشعارنـا بإشعارهـا
ومالنا في التميمـي اقتـراب
دارنـا ماتـقـرب دارهــا
ويش جاب الحقايق للسـراب
من رماهـا يحـق عيارهـا
كلمة الحق ماعنهـا اجتنـاب
وشمعة العز نشعـل نارهـا
فعل جداننـا هـد الصعـاب
ترسي الخرمه بنا فأخطارها
من بغى دارنا حسّب حساب
تشهد الجوفا بفعل أحرارهـا
والحنو والزرايب والهضاب
فعل ربعي بماض أدوارهـا
بعالية نجد نسكـن مانغـاب
وفي المواقف نجي حضارها
أصلنا ثابت بحـق وصـواب
في سبيـع الوفـا مقدارهـا
ورث أبونا لنا درع وحجاب
واسمنا فوق شـع أنوارهـا
مالنا في التميمـي انتسـاب
نسل عامر تطـول اشبارهـا



وقال عساف فهيد الحضبي الثوري السبيعي





حنا بني ثور الكرم والجد اسمه صعصعـه
الدين فينا والكرم ومقابـل الجمـع الكبيـر
أفعالنـا متوارثـه ماهـي بقايـا مجمعـه
كبيرنا يبقى كبير ويدرب الطفـل الصغيـر
حنا بني ثور الشجيعين اسمع العلم اسمعـه
أهل الوفا لهل الوفا على العدا شرٍ شريـر
حنا هل الوادي العوج والطيب حنا منبعـه
عاداتنا عز الخوي والضيف واكرام القصير
الخرمه ترثة جدنا فـي العاليـه متربعـه
اديارنا حامينها بالرمح والسيـف الشطيـر
انشد وتاريخ العرب يخبرك عنـا مرجعـه
حنا سبيع ولا لنا في اسمنـا أحْـدٍ خشيـر
حنا سلاطين الوغى سيف العدالـه نرفعـه
وان جاء من الحاكم ندا رسولنا يمه بشيـر

و

قال الشاعر فلاح بن ضاوي الحنّان الثوري السبيعي في قصيدة طويله:





آلاد الوجيرب عزوتي فـي قبيلتـي
حماة الديار وهـم ذراهـا حجابهـا
وفرسانهم تقهـر جيـوش مسلحـه
ليا حميت الهيجـا وقيـف ضبابهـا
ليا دخن البارود تضحك صدورهـم
عراض النحور اللي رحاب البابهـا
مصاويط عج الخيل في ساعة الوغى
مقابيل في حامي الوطيـس التعابهـا
وفي حرزهم يلقى السعد طالب السعد
لهم رايـة بيضـاء ولحـدن شنابهـا
كرام الوجيه ومحذية مفلس السـرب
سناد الصديق اللي لجـا والتجابهـا
لهم ديرة شوق النظر فـي جمالهـا
عذاب مساقيها وطيـب الكـلاء بهـا
رواح الغمام وفيض الانهار سقيهـا
ثمار النخل فيها ونبت الغضـاء بهـا
وحمر النعم ملك الكريميـن نشرهـا
دوام عراب النـوق ترتـع شعابهـا
لها هيبة من يوم عامـر نـزل بهـا
غزال المها والريم رب الخـلا بهـا
وهي جنة الدنيـا وقومـي نزولهـا
تحت فيها الخوداء تنقـش خضابهـا
لحون الحمامه في شوامخ غصونهـا
طروب الربابه في لحون الغنـا بهـا
سقى الله دار الجود منابـع الصخـا
وهي ديرة الغلبا سبيع الصخـا بهـا
قبايل سبيع اهل الشيم واهـل القيـم
وكم نافله تاريخ الامـه حكـى بهـا
سلايل بني عامر سنـادي ومسنـدي
تواريخهم لـي منهـل يقتـدى بهـا



وقال سلطان بن مقعد الثوري السبيعي :


انـا مـن قبيلـه فعلهـا شاهـد لهـا
وجميع القبايل كل منهـم لـه افعالـي
انا من سبيـع اهـل الموجيـب كلهـا
يورخ لهم بالطيـب تاريـخ الابطالـي
سبيع اهل الطـولات بالليـن والقسـا
هل العرف والمعروف رجلي وخيالـي
يسمون بالغلبـا علـى شـان مجدهـم
ينومس ويفخر فيه مهما الزمن طالـي
اقوله وانا ربعي بنـي ثـور وافتخـر
الاد الوجيرب كفو فـي سلـم وقتالـي
انا واحد منهم علـى اليسـر والعسـر
وماصابنـي جاهـم وماجالهـم جالـي
بني ثور اساس الطيب والطيب ساسهم
خذوا طيبهم بالفعل مبطـي ولا زالـي
ذرا للخوي والجار والضيـف عندهـم
يلاقي المعـزه والشحـم والتبهلالـي
هل السلم واهل الحرب موت على العدا
كلام ثبوت ويشهد اللـي توحـى لـي
اهل مرجله واهل شجاعه واهل كـرم
واهل مرحبا يوم القسا واشهب اللالـي
هل الدين واهل العدل والعرف والوفـا
اقول الصحيح وواجب الحـق ينقالـي
حمو دارهم من كـل طامـع ومعتـدي
حموها بحد السيف من ماض الاجيالي
ليـا جـا عـدو معتـد طامـع بـنـا
بني ثور تاقف صـف حمايـة التالـي
ليا قالوا ابن هليمه الصف جـا واحـد
مقام سوى مايبنـي المجـد الاهمالـي
ولاقالـوا الحضبـي نجـرد سيوفنـا
ذكرنا فعول منيـر والجيـش زرفالـي
يجي صفنـا واحـد ولا فيـه تفرقـه
ويصيب الخصم من صفنا ذل وذلالـي
ولاقيل ابـن ضبـان ينشـاف جمعنـا
يهيل العدا ويعمهـم خـوف وجفالـي
ولا قيل ابـن ثامـر ينومـس مقامنـا
نساند شيوخ الشمل لـو الدهـر مالـي
ولانيـب بقارنهـم بماضـي فعولهـم
ولاني بجاحـد فعلهـم وقتنـا الحالـي
وباقـي بـدود ربوعنـا نفتخـر بهـم
بني ثور عزوتنا هل المنـزل العالـي
هـل الجـاه والتقديـر يازيـن دلهـم
تعلو على عالي الشرف والشرف غالي
ذرايه وذخري واسندي واعتـزي بهـم
ذرايه بعد ربي فـي حلـي وترحالـي
عسـى الله يسلمهـم رفيـع مقامـهـم
ووقفاتهـم دايـم شريفـات وجزالـي
وعيال الحمايـل كفـو مانـي بذمهـم
زحول الرجال اللي يمانيهـم اطوالـي
[/poem]

[عبدالله الحضبي السبيعي]

وقال الشاعر غالب بن منصور بن لؤي الشريف رحمه الله
يصف ديار بني ثور :


دار عليها الحلا للناس مرغوبـه
فيها الأدامي وفيها الريم متخاوي
لسبيع بن صعصعه ماهيب منهوبه
اللى حموها عن الروقي وبرقاوي
000000000000000000

وقال شباب بن باتل الصميلي رحمه الله :


أنا لا حكى الحاكي وقالوا خوالك مـن
تكلمت بالصوت العلا وارتفـع راسـي
خوالي هل الوادي العوج محرقين البـن
الاد الوجيرب يـوم الاريـاق يباسـي
اهل قالة(ن) تدرى وشلف(ن) وخيل تعن
فعول(ن) نطول ابها جداد(ن) ودراسـي

000000000000000000

وقال عبدالله الحضبي :


حنا بني ثور من أصل ونسب
ما ننتسب للربـاب ولا تميـم
حنا من سبيع لا عـد النسـب
نفخر بابن صعصعه جدٍ قديـم
الاد الأجرب ليا حان الطلـب
دعوى الزكور العريبه فالصميم
0000000000000000000


وقال الشاعرسفر بن نهار الثوري السبيعي


سلام يا من دون الفعل تدوين " "فتح لنا ابواب القصيد وبدينا
فعله ثمين وكلمته توفي الدين " "وماخذ صفات شيوخنا الاولينا
لايا حفيد مرجحين الموازين" "سيوف الأرض مدلهين الحزينا
قلت الصحيح انا كثر دولة الصين" "يا شيخ والله كثرها مرتينا
حنا يابن عجران فقنا الملايين" "بأعدادنا وفعولنا لأعتزينا
منا فروع في جميع البلادين " "لاكبرت القالات منا وفينا
ومنا هل عنيزة شيوخ سلاطين" "اللي بعال المجد متمكنينا
اليا تجمعنا دحرنا الشياطين" "ولا نتفرق غير متفاهمينا
مقرنا الخرمة غروس وبساتين" "حنا لها يا شيخ درع حصينا
من دونها يا شيخ ما فيه ثنتين" "وان ما احتميناها تعقل يدينا
لا والذي نزل تبارك وياسين" "ونزل لنا القرآن علم مبينا
والله ما حنا عن الدار لاهين " "ياسعود لو رحنا يسار ويمينا
ولو زعزع العزوة صغير من البين " "ياشيخ لا منا سمعناه جينا
جينا لو انا من ورا خط برلين" "ولو بعضنا من ورا طور سينا
جينا تقول انا على الهوش شفقين" "على السيوف ارواحنا شايلينا
وش قال جدك في امام المصلين" "قد قال له في ماضيات السنينا
يابن الأمام ان لابتي من ورا تين" "لي لابة نكعم بها المعتدينا
انتم لنا وافين في العسر واللين" "وحنا لكم وافين عسر ولينا
من عامر بن صعصعة لين ذا الحين" "في اللين والشدات متكاتفينا
نفخر بفزعاتك لنا ياحمر العين" "في ساعة الشدات مثلك يبينا
وفيت يا نسل الرجال الوفيين" "يومن شيوخ آخر زمن تايهينا
فعلك ثمين وقفتك توفي الدين" "وماخذ صفات شيوخنا الأولينا
مشكور منا عد سكان بكين" "ياللي خذيت الطايلة باليمينا
وعن انتخابات البلد مستعدين" "ابشرك حنا بها فايزينا

[ابن فيحـان]

ونعم وسبعة انعام في بني ثور وفي سبيع عامه

الف شكر لك اخي على القصائد الجزله

تقبل مني اطيب تحيه وتقدير

[محمد بن سلطان السبيعي]

استاذي عبدلله بن سعد الحضبي صح لسانك ملايين ..

ويا ليت لو تورد لنا قصائد شعراء بني ثور الباقيه في الرد على من نسبنا يا بني ثور الى الرباب من بني تميم ..

لان حاولت ايجادها في طيات منتديات سبيع ولم اجدها ..

وتقبل تحياتي استاذي الفاضل ،،

اخوك
محمد بن سلطان الثوري

[الفيحاني]

والنعم بااسبيع كلهم

[عبدالله الحضبي السبيعي]

شكرا لك يالفيحاني وبيض الله وجهك على الاشاده يالغالي
وشكرا لك يابو سلطان
حنا بني ثور من أصل ونسب
ما ننتسب للربـاب ولا تميـم
حنا من سبيع لا عـد النسـب
نفخر بابن صعصعه جدٍ قديـم
الاد الأجرب ليا حان الطلـب
دعوى الزكور العريبه فالصميم

[مغرور سبيع]

انشهد انك يا الثوري كفيت ووفيت والله انا من العلي من الجعدان اني احب واقدر قبيله بني ثور ووالله انك منت تميمي والله والله انك من رؤؤؤؤؤس سبيع يا اسباع الجزيره وتشهد الخرمه بفعالكم يازين دلكم بس يازين قربكم الواحد لاجا عند ثوري يرفع راسه ولحد يقدر عليه لو انه ذابح نص الكره الارضيه لو لم اكن علوي لتمنيت ان اكون ثوري وتقبل مني اجمل التحايا

[عبدالله الحضبي السبيعي]

بيض الله وجهك يامغرور سبيع
انشهد انك طيب ومن اسره عريقه
وردك دليل على مجدك
نفتخر بك وبأمثالك
وليست غريبه على قبيلة ال علي اهل المجد والطيب والمكارم
شرفت المنتدى وردك فخر لنا
ويكون في علمك اننا نكن لكل المخلصين الحب والوفتاء
تحياتي

:m_thumb: :m_love:

[السبيعي]

شكرا لك ياعبدالله الحضبي على المعلومات القيمه
والتي تثبت نسب بني ثور
والتي تلجم من يريد ان ينسبهم لغير سبيع العامريه
بني ثوروالعرينات من سبيع اصل وفصل

[عبدالله الحضبي السبيعي]

من القصائد التي تبين
دور قبيلة بني ثور وامجادهم
http://www.sobe3.com/vb/showthread.php?t=5603

[السبيعي]

شكرا لك ياعبدالله الحضبي
معلومات قيمه تحيااااااااتي

[ALjoori]

شكرا .. الله يعطيك العافيه